Mga namamatay tungod hin kagat han ayam ha Region 8, nagtitikadamo

254

PALO, LEYTE – Ginkakabarak-an yana han Department Of Health Region 8 an paghataas han porsyento han kaso han animal bite ngan namamatay ha bug-os nga rehiyon.

Dida han nakalabay nga tuig, 13 an nakagat hin ayam ha bug-os nga Rehiyon Otso an namatay. Ngan yana nga tuig, 2 na an naitala nga namatay matapos an duha ka-bulan han Enero ngan Pebrero 2018.

An mga biktima dida han nakalabay nga tuig in duha nga taga Ormoc City, duha ha Lavezares, Northern Samar, duha ha Carigara, Tanauan ngan Baybay.


Yana nga tuig usa na liwat an namatay ha Lavezarez, Northern Samar ngan ha Kananga, Leyte.

Sumala kan Boyd Cerro, Regional Epidemiology and Surveillance Unit han DOH-8, an panuyuan yana han DOH nga tutukan an programa nga paghatag hin awareness ha mga katawhan ha paglikay ha rabies ngan an pagigin responsible nga pet owner.

Ha obserbasyon ha Department Of Health, an mga namamatay ha Eastern Visayas tungod han rabies in an mga waray magpabakuna matapos makagat.



Sumala kan Dr. Minerva Molon, Regional Director han DOH-8 nga damo nga mga hospital dinhi ha Rehiyon ilabi na dinhi ha Tacloban an mayada Animal Bite Centers.

Facebook Comments