Halos duha ka libo na sa karon ang natapikan sang tipdas sa bug-os nga Western Visayas.
Sa pinakaulihi nga data sang DOH Region 6, naglab-ot na sa 1,907 ang natapikan sang nasambit nga balatian humalin sang gindeklarar ang outbreak sini tubtub sang Abril 17 sini nga tuig.
Nagapanguna sa gihapon ang Negros Occidental sa may pinakamadamo nga kaso sang tipdas nga nagalab-ot sa 600 ka kaso kag ginasundan sang probinsya sang Iloilo nga may 419 naman ka kaso, nagapangatlo ang Antique nga may 307 ka kaso, pang-apat ang Siyudad sang Bacolod nga may 176 , panglima ang Siyudad sang Iloilo nga may 106 ka kaso, ang Capiz nagapang-anum nga may 102 ka kaso kag ang Guimaras nagapampito nga may 23 ka kaso.
Samtang, pito naman ang kumpirmado nga napatay kon sa diin may tag-isa sa Sibalum, Antique; Roxas City kag probinsya sang Iloilo samtang may apat naman sa Negros Occidental.
Ginpahayag ni Dr. Renilyn Reyes sang DOH-6 nga mahimo na nga dulaon ang measles outbreak sa rehiyon pananglitan wala na sang malista nga bag-o nga kaso sang tipdas sa sulod sang 42 ka adlaw.
