Gibutayag ni Ruel Lando, negosyante og bugas sa Barangay 8-A, nalisdan sa supply kay pa-unhanay karon, ang mga negosyante sa pagkuha og stock sa ilang mga supplier. Tulo ka supplier ang ginakuhaan sa bugas ni Lando sa Monteverde, Davao City, Bansalan ug Cotabato, apan naglisod pa gihapon sila sa stock.
Ulahing nasinatian ang pagnihit sa supply sa bugas niadtong tuig 2007, apan mas misamot karon kay wala nay local rice ug NFA rice. Matud ni Lando, naapektohan ang presyo sa bugas tungod sa pagkulang sa supply karon. Human sa duha ka semanang milabay, nagpa-usbaw na sila og P1.00 ngadto sa P2.00 sa presyo sa kilo sa bugas.
Sa kasamtangang presyo, ang usa ka sakong 7 tonner naa sa P2,550 ug P53 ang matag kilo, Magic 0 P2,600 ug P54 ang kilo. Magic 0 Double Diamond P2,650 ug P55 ang kilo, King B160 P2,750 ug P58 ang kilo, samtang ang Banay-Banay P2,700 ang sako.
Alternatibo karong ginapalit ang bugas mais, kay mapalit lamang kini sa P40 ang matag kilo kay mas ubos ang presyo kung itandi sa bugas humay.
Alayon niini gibutyag ni Lando, mas maayong ibalik sa kagamhanan ang NFA rice, aron ang mga kabus nga Dabawenyo, makapalit sa mas ubos nga presyo sa matag kilo.
RadyoMaN Joel Viray
