Gihangyo sa probinsiyal nga kagamhanan sa Lanao del Norte ang mga negosyante, ilabina ang mga adunay dagkung galingan, nga motabang aron masiguro nga adunay igong suplay sa bugas ang probinsiya samtang nagpadayun pa ang krisis sa coronavirus o COVID-19.
Sa usa ka panagtagbo kanila kauban si Gov. Angging Dimaporo, miingon ang gobernador nga dili kaya sa provincial government nga kini lang ang maglihok busa iyang gikinahanglan ang tabang sa sektor sa mga negosyante.
Sa maong mga negosyante, matud pa, mopalit ang provincial government og bugas nga maoy ihatag nga hinabang ngadto sa mga residente nga temporaryong gipa-undang sa ilang trabaho ug gilimitahan ang pag-gawas sa balay tungod sa COVID-19.
Ang ilang suplay, matud pa, maoy magsilbi usab nga augmentation ngadto sa mga munisipyo nga dili na makahatag og pagkaon sa ilang mga residente.
Mihangyo si Dimaporo ngadto sa mga negosyante nga i-priyoridad ang mga barangay nga nanghatag og bugas sa ilang mga pobreng residente samtang nagpatuman ang probinsiya og enhanced community quarantine.
Misanong usab ang mga negosyante nga sa probinsiyal nga kagamhanan sa Lanao del Norte nila ibaligya ang ilang mga bugas sa presyo nga tag 950 pesos matag 25 kilos sa mga regular rice variety. (Divina M. Suson, Lanao del Norte, April 3)
