Davao City – Dili pa matawag nga guilty ang mga opisyales sa mga barangay bisan og napubliko na ang ilang mga pangalan nga anaa sa drug list ni Pangulong Rodrigo Roa Duterte niining ulahing mga adlaw.
Gikanayon ni Pastors Auxiliary Chaplains Association International Founder and Chairman Bishop Dr. Ariel Coleto nga ang korte lamang ang makasulti kun guilty ba o dili ang tawong giakusahan sama sa mga anaa sa narco list ni Presidente Digong.
Aron mapabarog ang alegasyon batok sa mga barangay opisyal mas maayo dut-an na lang og kaso ang mga nahisgo-tan kun lig-on man lang ang gikuptan nga mga ibidinsiya sa nasudnong gobyerno.
Gipaneguro sa Philippine Drug Enforcement Agency (PDEA) nga una paman hingpit gimantala ang narco list miagi kini sa makuti nga balidasyon sa upat intelligence unit sa gobyerno.
Apan kumento ni Bishop Coleto, dunay buslot ang balidasyon sa drug list ug kamatooran niini mao ang pamahayag sa DILG Bicol nga daghan sa mga anaa sa listahan wala na mibalik sa paglambigit sa iligal nga droga.
Busa nagtoo ang Obispo nga dili updated ang narco list ug mao kana ang hinungdan ngano dunay mga barangay opisyal nagpabilin gihapon sa watch list ni Pangulong Duterte bisan og na-abswelto na sila sa miaging mga buwan.
Gitindugan ni Bishop Dr. Ariel Coleto nga bugtong ang korte lamang ang makadeklara kun guilty ba o dili ang mga barangay opisyal nga anaa sa narco list ni Pangulong Duterte.
RadyoMaN Joel Viray
