Patuloy na bumabangon ang mga pamilyang nasalanta ng Bagyong Uwan sa San Fernando, La Union, habang ipinapatupad ang mga hakbang para sa agarang tulong at rehabilitasyon.
Apektado ng bagyo ang libu-libong pamilya dahil sa malakas na hangin, matinding ulan, at storm surge na sumira sa mga bahay at nakagambala sa kabuhayan.
Ayon sa ulat ng Ilocos Regional Disaster Risk Reduction and Management Council, aabot sa 41,361 pamilya o 127,704 indibidwal ang naapektuhan sa buong La Union.
Nagbigay ang pambansang pamahalaan ng iba’t ibang tulong kabilang ang shelter fixing kits, 500 food packs, tilapia fingerlings, at materyales para sa pagkukumpuni ng mga bahagyang nasirang bangka.
Kasabay nito, ipinamahagi ang Emergency Cash Transfer benefits at financial assistance na nagkakahalaga ng P1.46 milyon sa mga benepisyaryo, pati na rin ang 1,800 vegetable seed packs at suporta mula sa TUPAD at Integrated Livelihood Program na umabot sa higit P24 milyon.
Patuloy rin ang monitoring at koordinasyon ng mga lokal na opisyal at ahensya upang matiyak na maayos na naipapamahagi ang tulong sa mga apektadong pamilya.
Ani lokal na lider, pangunahing prayoridad ang pagpapatibay ng mga pabahay at pagbibigay ng suporta upang maiwasan ang malalaking pinsala sa susunod na kalamidad.
