Sa pakighinabi sa DXDC RMN Davao sa residente sa Malita nga si Shai Ma Delecias, iyang gibutyag nga sa pagkakaron, naglisod sila sa ilahang kahimtang samtang padayon pa ang pagbaha tungod sa sagunson nga power interruption.
Gipasabot niya nga problema sa ilaha ang kawad-on sa kuryente tungod dili nila mabantayan o makita kung nitaas ba ang baha ug kung nikusog ang bul-og sa tubig.
Dugang ni Delecias nga sa kangitngit sa palibot, dili sila dayon makapangayo og tabang kung ugaling kinahanglang mubakwit.
Hinuon, sa interview usab sa DXDC RMN Davao kang kang Franz Irag, ang Office of the Civil Defense (OCD) XI Operations Officer, iyang gipaniguradong nakig alayon na ang OCD XI sa Malita Municipal Disaster Risk Reduction and Management Office (MDRRMO) alang sa hugot nga monitoring ug paglusad og Rapid Damage Assistant and Need Analysis (RDANA) aron masuta ang damyos ug aron usab ma-rescue kadtong mga indibidwal nga labing apektado.
RadyoMaN Ivy Parido
