TACLOBAN CITY – Ginpapanawagan ni Biliran Congressman Rogelio Espina para ngadton mga parag-uma nga an mga tuna ngan pananom in naapektuhan han bagyo Urduja ha ira probinsya nga mag report ha ira Municipal Agriculturist agud maka-avail han programa han Department of Agriculture National Office nga matatagan hin tag P25,000 tagsa-tagsa an mga biktima nga naapektohan an ira productive agricultural land.
Ha gin-post ha facebook account ni Cong. Espina, an P5,000 han P25,000 in usa nga grant para han housing ngan pagkaon han mga biktima ngan an P20,000 in usa nga loan ngan babayaran ha sakob han 3 ka tuig nga waray interest.
Sumala han opisyal, kinahanglan na ma-rehabilitate an mga tuna ngan tikangan na an pananum bisan paman maiihaan pa an pag ayad han mga irrigasyon.
Dugang pa han opisyal, an mga naguba nga umahan ha Biliran nga waray irrigasyon in makaka-avail gihapon han sure program han Department of Agriculture.
