Nadawat nan nabiling pamilya nan magtiayong namatay na sila ni Jhuney ug Jennifer Labandero an pasiuna na tabang pinansiyal na tagpaabot pinaagi sa RMN DXRS.
An tabang an tagdawat ni Mirasol Padao Gabayan, an inahan ni Jennifer ug amoy nagmatuto nan duha ka nabiling apo na nagpangidaron nan 2 ug 5 anyos pa lamang. Emosyunal na tagpadayag niini an pasalamat sa tanan mipaabot nan tabang na sumaya pa makatabang ini ngadto sa ila inadlaw na panginahanglan hangtud na malubong sa Sabado an duha na namatay. Lakip isab an gatas ug pagkaon sa duha ka nabiling anak.
Tag-asoy isab niini an makaluluoy na reaksiyon sa ija 5 anyos na apo sa dihang una na taghaya kagabii an ija namatay na inahan ug amahan, tagpikit sa bata an ija uyo ngadto sa espijo nan lungon ug nagpatuyo sa ija luha, nagsampit sa ija inahan. Dugang pa ni Gabayan, nalooy sija ug nagproblema kon unoy mahitabo sa kaugmaon sa ija duha ka apo human malubong an namatay na ginikanan.
