Roxas City, Capiz – Padayon sa gihapon nga naka- alert status ang bilog nga hanay sang Philippine Coast Guard – Capiz bangud sa malain nga panahon nga dulot sang Low Pressure Area (LPA). Ini ang ginpahayag ni Coast Guard Station Commander Joe Luvis Mercurio. May kaangut sini hugot nga ginpanugyan ni Mercurio, nga bawal sa gihapon nga makalayag ang mga magagmay nga sakayan ilabi na sa mga island barangay sa isla sang Panay bangud sa mamadlos nga hangin kag dalagku nga balud. Samtang iya man ginpasiguro nga ‘operational’ ang tanan nga mga assets sang Philippine Coast Guard – Capiz kag nakahanda sa anuman nga mga pag-responde pananglitan may yara sang emerhensiya. Nahibaluan nga may yara sang lima tanan ka mga substation ang Philippine Coast Guard sa probinsya sang Capiz kag ini ang nahamtang sa Barangay Basiao sa banwa sang Ivisan; may yara sa banwa sang Pilar; may yara sa Banica wharf sa Barangay Banica subong man sa Libas Fishing Port kag main office nga nahamtang sa Culasi Port sa Roxas City.
