Mga Pinoy sa Iraq, ginapahanda sang DFA sa posibilidad sang mandatory evacuation kon maglala ang tension sa pungsod

454

Nagpanawagan ang Department of Foreign Affairs (DFA) sa mga Pilipino sa Iraq nga maghanda sa mandatory evacuation pananglitan maglala ang tension sa nasambit nga pungsod.

Ginpahayag sang DFA nga dapat hugot nga makig-angut ang nasambit nga mga Pilipino sa Philippine embassy kag sa ila tagsa ka mga employer pananglitan kinahanglan ang mandatory nga evacuation.


Suno pa sa DFA nga dapat kanselahon naman sang mga Pilipino ang ila biyahe sa lugar agud indi sila madalahigan sa anuman nga kalakasan.

Ginhimo sang DFA ang panawagan matapos mapatay sadtong Biyernes sa airstrike sang United States ang top Iranian commander nga si Qasem Soleimani sa Baghdad international airport sa Iraq.

Ginpahayag ni DFA Assistant Secretary Ed Menez nga base sa impormasyon gikan sa embahada , yara sa alert level 3 na ang crisis alert level para sa tanan nga mga lugar sa Iraq magluwas sa Iraqi Kurdistan region nga nagapabilin sa alert level 1.

Suno sa iya nga hugot nga ginamonitor nila ang sitwasyon sa Iraq kag nakahanda ang DFA nga magpadala sang rapid response team kon kinahanglan.// SSPunay News

Photo from web




Facebook Comments