General Santos City—Hingpit nang gideploy sa nga nagkandaiyang polling centers dinhi sa syudad ang mga Police Gensan.
Nasayran nga kagahapong adlawa gipahigayon ang send off ceremony ngadto sa gatusan ka mga police nga magsilbi karong May 13 Midterm Election.
Matud ni Police Col. Aden Lagradante, PNP City Director sa Gensan City Police Office nga 820 ka mga personahe ang ilang gideploy sa mga Polling Centers kansa gilangkuban ug 720 gikan sa PNP ug 100 gikan sa JTF Gensan.
Dugang pa sa opisyal nga 70 porsyento sa ilang pwersa ang ilang gideploy samtang ang 30 porsyento niini maoy nahibilin sa ilang mga buhatan kansa maoy motutok sa ilang mga trabaho hilabi na sa mga paper works.
Atol sa send off ceremony-bugtong pahimangno lang ni Lagradante sa iyang mga sakop nga mosilbi sa election nga dili mag apil-apil sa pulitika ug likayan ang pagdawat ug pagkaon gikan sa mga kandidato aron nga dili madudahang may gikampihang kandidato, sanglit dapat tutukan ra sa kapulisan ang paghatag ug seguridad sa mga polling centers ug mga election paraphernalia’s sama sa VCM nga gamiton sa election.
