Naglunsar sang hublag protesta ang nagkalain-lain nga progresibo nga grupo sa pagpanguna sang Karapatan kag Bayan-Panay kahapon kadungan sang pagdumdum sang International Human Rights Day.
Ala-una sang hapon, nagtipon sa Capitol grounds ang nagkalain-lain nga cause oriented groups kag naghiwat sang programa agud ipalab-ot ang ila mga hibubun-ot angut sa kawad-an sang hustisya sa mga nagkalatabu nga mga pagpatay sa mga inosente nga mga tawo bangud sa away kontra sa druga lakip na ang pagsukot sa gobyerno sa mga ginpangako sini nga wala gihapon mahatagan sang katumanan.
Ginpahayag ni Reylan Vergara, chairman sang Karapatan nga padayon ang ila pagbantay kag indi sila mag-untat sa pagpakigbatu sang kinamatarung sang mga pumuluyo batuk sa pagpamigos kag pagbalewala sang gobyerno.
Ginhatagan pagtamod ni Vergara nga indi man nila pagpasugtan ang anuman nga tuyo sang gobyerno nga busalan ang baba sang progresibo nga mga grupo pinaagi sa pamahog nga magpatuman sang mala-diktador nga pagpalakat sang gobyerno.
