Kaparte han Internal Cleansing Operations han PNP, nagdumara hin on the spot random drug test an Regional Crime Laboratory ha mga kapulisan han Tacloban kakulop, Oktobre 27, 2017.
Sumala han Police Regional Office, panuyo hini nga internal cleansing nga malimpyo an hanay han pulisya mahitungod nga mayada man gud pipira nga kapulisan ha Pilipinas an nahidadabi ha illegal nga droga, kidnapping, murder, pag abuso ha otoridad ngan iba pa nga illegal nga buruhaton.
Sumala naman han tagapagyakan han Tacloban City Police Office nga hi PCInsp. Rex Cantillep, ginpa-ilarom ha drug test adton mga kapulisan nga nagdumara hadi hin anti-illegal drug operations para malimyo an ira reputasyon.
“An pokus man gud han drug test adton mga pulis nga na-involve han anti-illegal drug operation para maiwas in doubt nga karuyag sidngon nga clean hira nga waray hira ka involve han illegal drug activities.”
Mayada liwat aktibidadis nga ginbubuhat han Tacloban PNP para malikayan han mga pulis nga magbuhat hin diri maupay. Athletic activities sugad han basketball, volleyball ngan iba pa, makakabulig na ha ira, magiging physically fit pa hira.
“Gin-iinvolve ito hira hin athletic activitiespara ma-focus hira hin usa la nga areas ngan tatagan ito hira hin assignment para malikayan nira iton illegal activities.”
Sigun pa han tagapagyakan nga kun maging positibo ha illegal nga droga an ginpa-ilarom ha drug test, igsa-sumbit an ira ngaran ha camp crame ngan papasakahan hiton kaso nga kriminal ngan administratibo.
