Hilabihan ang kalipay sa mga persons with disabilities kon PWDs ug mga senior citizen dili lang mga taga-Sarangani Province kundilli apil na ang mga taga-Gensan, Polomolok, Tupi, Koronadal City ug Sultan Kudarat human libreng natagaan og mga assistive devices kagahapong adlawa, adlaw nga Martes, sulod sa Sarangani Provincial Hospital.
Sila ang laing batch sa mga indibidwal nga nakadawat ug mga kaayuhan sa regular na nga programa ni Sarangani Governor Steve Chiongbian Solon kabahin sa Walking Free Mission katugbang ang mga dagkong charity organization nga gikan pa sa kauluhang Maynila – ang Physicians for Peace, LDS o Latter Day Saints Charities, lakip na ang PGH kon Philippine General Hospital. Bise Gobernador pa kaniadto si Governor Solon iya na kining namugna nga kalihukan ilalum sa iyang programa nga Serbisyong Sarangan Community Outreach.
Mukabat sa Tres Milyones ka pesos (P3M) ang kantidad sa mga assistive devices nga nahatag kagahapong adlawa apil ang pagkarga niini padulong sa Kapitolyo sa Sarangani, gilangkuban sa singkwenta (50) kabuok standard wheelchair tag P35,000 matag usa; usa (1) ka customized wheelchair tag P40,000; baynte-otso (28) kabuok regular prosthesis o artificial nga tiil tag P18,000 matag usa; special nga artificial leg tulo (3) kabuok tag P50,000 matag usa; ug naay napulo (10) kabuok tungkod kon crutches, lima (5) ka cane, duha (2) ka quadcane, duha (2) pud ka blind stick makatabang sa paglakaw, ug walo (8) ka cushion magamit aron dili malisdan sa pagpungko.
Halos mutulo ang luha ni Nong Tony, saysenta (60) anyos, taga-Uhaw, Fatima, Gensan tungod makalakaw na kini gamit ang artificial leg, gitagaan pa kinig wheelchair. Dakong tabang matud pa ang iyang mga nadawat sa iyang sitwasyon karon nga wala nay tiil, may mga balatian pa syang gibatyag sama sa diabetes, highblood ug heart failure.
Iya matud pang nakita sa telebisyon ug nadunggan sa radyo ang programa ni Governor Solon maong niadto kini sa Kapitolyo sa Sarangani. Wala matud pay local official nga adunay dakong pagpangga kanila nga may kapansanan kundili anaa ra sa Sarangani sa pagpanguna ni Governor Solon. Dili man matud pa sa pagpang-unsa apan sa Sarangani niya matud pa nakita ug nakuha ang buo nga pag-ayuda kanila.
Walay laing mensahe si Governor Solon kundili ang pagdasig sa tanan nga maningkamot sa pagpanginabuhi ibabaw niining kalibutan tungod kay dili babag ang diperensya sa panglawas, Iyang gi-example si Jhonna Von Malida, traynta (30) anyos taga-Tupi, South Cotabato nga anaa usab kagahapon, nga usa na kini ka lisensyadong pharmacist bisan nawad-an kinig tiil sa nag-edad pa kinig katorse (14) anyos gumikan sa disgrasya sa dalan.
Anaa si Malida kagahapon sa Sarangani Provincial Hospital nakadawat pug wheelchair.
Segun ni Governor Solon nga sa Sarangani Province ila gayung gipaningkamutan kauban ang mga charity foundation ug government agencies, kuyog usab sila Senador Manny ug Congressman Ruel Pacquiao, Sangguniang Panlalawigan, mga mayores, ug ang opisina ni Sarangani Provincial Health Officer Dr. Arvin Alejandro ug PSWDO Sarangani, nga kadtong mga bakol ang makalakaw, makakita ang may problema sa mata, ug makadungog ang may diperensya sa pandungog. Karong bulan sa Nobyembre pohon, libreng hearing mission napud alang sa may problema sa pandungog katugbang ang Starkey Hearing Foundation.
