TACLOBAN CITY – Tanan nga panimalay nga gindeklara han Mines and Geoscience Bureau o kun MGB kumo landslide prone areas ha syudad han Tacloban in ginpadad-an na hin notice han Tacloban City Engineering Office nga bumalhin na hin panimalay, ini nga pitad in matapos an trahedya nga natabo dida han nakalabay nga Enero 2018 kun diin upat nga residente han Brgy, 43-B Quarry, Tacloban City an namatay tungod han maraot nga panahon.
Sumala kan Engr. Dionesio de Paz, Head han Tacloban City Engineering Office, hasta yana in waray la gihapon bisan usa nga pamilya nga bumalhin tikang ha ira presente nga gin-uukyan rason nga gin padad-an naliwat hira hin waiver. Ginhuhulat nala daw han City Engineers kun ano an magigin sunod nga pitad han Tacloban City Disaster Risk Reduction Management kabahin han mga problema.
Hangyo han City Government nga temporaryo la anay nga bumalhin an mga residente ha Abucay Evacuation Center samtang waray pa hira maibalhin ha mga relocation sites.
Dugang pa ni Engr. Bonifacio nga kinahanglan nagud pabalhinun an mga residente nga namumutang ha danger zone kun diin delikado ha mga tikaarabot nga kalamidad.
