TACLOBAN CITY – Nagtagya kay higara na ha bagyo an iba nga mga residente ha Naval, Biliran, ini an nakikita nga rason han Municipal Disaster Risk Reduction Management Office han Naval, Biliran kun kayano an mga residente in waray dayon mag-evacuate ha talwas nga lugar dida han paglasurbo Bagyo Urduja.
Sumala kan Raul Villardon, Head han MDRRMO ha bungto han Naval, diri naglalaum an mga residente ha ira lugar nga magkaka-landslide ngan sugad man an kaiha nga pag-uran mahitungod nga mapapailarom man la ha signal number 2 an ira probinsya.
An municipalidad han Naval ha Biliran an may pinakadamo nga naitala nga namatay nga umabot na ha 20 ngan 7 pa iton padayon nga ginbibiling.
Dugang pa han opisyal, nga naupod an ira bungto ha ginbuhat nga geo-hazzard mapping han MGB dida han 2012 ngan gin-classify na hini han mao nga buhatan nga high risk ha landslide. Tikang dida han 2012, in maaram na daw an mga residente han kadilikadohan kun diin gin-tindog an ira mga panimalay.
Pahimatngon pa han opisyal, nga diri akos han Local Government Unit ha Naval nga ig-relocate an tanan nga nag-uukoy ha mga landslide prone area ha ira lugar. An mao daw nga aksyon in kinahanglan hin bulig tikang ha iba-iba nga ahensya han gobyerno.
