Muling pinag-iingat ng National Disaster Risk Reduction and Management Council (NDRRMC) ang mga residente ng Palawan kaugnay ng panibagong rocket launch ng China mamayang gabi.
Batay sa memorandum ng NDRRMC , ilulunsad ang Long March 8A rocket sa Hainan International Commercial Launch Center mula 3:00 hanggang 3:36 ng madaling araw, oras sa Pilipinas.
Inaasahang babagsak ang ilang bahagi ng rocket o debris, 130 nautical miles mula sa El Nido, Palawan, 55 nautical miles mula Tubbataha Reef Natural Park at 27 nautical miles sa Hadji Muhtamad Basilan.
Dahil dito, muling inatasan ng NDRRMC ang Philippine Coast Guard (PCG), Bureau of Fisheries and Aquatic Resources (BFAR), Department of the Interior and Local Government (DILG) at Department of Environment and Natural Resources-National Mapping and Resource Information Authority (DENR-NAMRIA) na magpatupad ng temporary restrictions sa mga apektadong lugar.
Kabilang dito ang paglalabas ng Notice to Mariners at Navigational Warnings.
Muli rin ngababala ang Philippine Space Agency (PhilSA) sa publiko na huwag lapitan o pulutin ang anumang debris na maaaring bumagsak sa dagat o lupa dahil sa panganib ng exposure sa nakalalasong kemikal gaya ng rocket fuel.
