Kapin usa ka gatos ka mga pamilya kinsa apektado sa paghapak sa Bagyong Vinta sa Maranding, Lala , Lanao del Norte niadtong nakalabayng Disyembre, ang nakadawat sa mga relief goods nga gihatud pinaagi sa mga sakop sa RMN DXIC kauban ang mga sakop sa social media group nga Iligan Pulse – News and Update.
Sangko sa langit ang pasalamat sa mga residente sa Purok Lemon Tree ug Dao sa ilang mga nadawat nga mga sanina, sapatos mga bugas ug noodles gikan usab sa mga Iliganon nga mihatag sa ilang tabang pinaagi sa RMN DXIC ug sa maong social media group.
Matud pa sa purok president sa maong dapit, nga dako ang ilang kalipay nga nakadawat sa maong hinabang sanglit, ang uban sa mga residente ang anaa pa sa gym human nga dili pa mabalikan ang ilang balay gumikan sa kalapok ug ang uban dili na mapuy-an gumikan kay naguba na tungod kay hinimo sa light materials.
Dugang pa niya , nga problema nila karon ang ilang tubig nga mainom tungod kay nangadaot ang linya niini gumikan sa pagbaha.
