Gitakdang modunggo karong adlawa sa pantalan sa Ozamiz City ang usa ka barko nga adunay sakay nga kapin 300 ka mga seafarers o marino diin lima kanila ang monaug aron mo-uli sa probinsiya sa Misamis Occidental.
Apan dili sila panaugon ug dili dawaton sa kagamhanang lokal sa Ozamiz City ug sa probinsiyal nga kagamhanan sa Misamis Occidental.
Kini tungod kay matud pa ni Misamis Occidental Governor Philip Tan, wala silay clearance gikan sa Inter-Agency Task Force COVID-19 sa probinsiya ug sa uban pang mga local government unit, ilabina sa Sinacaban, Jimenez ug Plaridel kung asa sila manguli.
Wala matud pa masayod ang IATF COVID sa ilang health record ug status tungod kay wala man mapahibalo ang probinsiya sa ilang pag-uli.
Gipatuman pa sa tibook probinsiya sa Misamis Occidental ang executive order nga nag-ingong gikinahanglan ang clearance sa LGU nga uli-an ni bisan kinsang residenteng na-trap sa ubang dapit nga bu-ot nang mouli sa probinsiya.
Kabahin kini sa kasamtangang general community quarantine sa lalawigan.
Gawas sa limang taga Misamis Occidental, adunay usay mga marinong sakay sa maong barko nga mo-uli sa Lanao del Norte ug sa Zamboanga del Sur apan wala maklaro kung aduna silay clearance sa ilang matag probinsiya. (Divina M. Suson, Misamis Occidental, April 28)
