Irerekomenda ni Agriculture Secretary Francisco P. Tiu Laurel Jr., kay Pangulong Ferdinand Marcos Jr., na ipamahagi ang nga frozen mackerel na nasabat ng Bureau of Customs (BOC) sa Manila at Subic port.
Kasunod na rin ito ng inilabas ng Bureau of Fisheries and Aquatic Resources (BFAR) na laboratory test na ang mga smuggled na isda ay ligtas para sa human consumption.
Kasabay nito, hihilingin na rin ni Laurel sa BOC na ilipat ang frozen mackerels sa Department of Agriculture (DA) at ito ay ibibigay sa mga government relief agencies gaya ng Department of Social Welfare and Development (DSWD) o ng Office of the President.
Kung maalala, nasa kabuuang pitong container vans, dalawa sa Manila North Harbor at lima mula sa Subic Freeport ang nakumpiskang smuggled mackerel ng Department of Agriculture Inspectorate and Enforcement Office kasama na ang Bureau of Plant Industry (BPI).
Tinatayang mayroong bigat ang bawat container van na 30 metric tons ng frozen mackerel.
Puwede itong pakinabangan ng nasa 210,000 households.
