Pagadian City – Sa unang duha ka adlaw nga pagbalik sa operasyon sa Pagadian City airport, anaa sa 188 ka mga stranded Zambosurians gikan sa Metro Manila ang nakabenepisyo sa Balik Probinsya Program ni Pamuno Nasod Rodrigo Duterte ang malipayong gidawat sa Zamboanga del Sur ug Pagadian City government.
Adlawng Lunes mitugpa sa Pagadian Airport ang Cebu Pacific sakay ang 54 ka mga pasahero sa may 8:20 sa buntag diin 24 niini ang mga residente sa Zamboanga del Sur.
Duha ka flights usab sa Philippine Airlines (PAL) ang mitugpa adlaw nga Martes diin 75 ka pasahero ang nahidangat alass 8:50 sa buntag ug 89 kabuok ang niabot sa may 3:30 sa hapon.
Gipasalamatan sa ZDS COVID19 Sub Task Force for LSIs and ROFs sa pagpangulo ni Provincial Tourism Officer Atty. Jihan Bana ang Pagadian City Government sa pagpanguna ni Mayor Sammy Co sa sa mga pasilidad sa arrival area nga nagsilbing pahulayanan sa mga pasahero samtang gipatuman ang mga health protocols ug ang paggahin usab sa Pagadian OFW Global Association ug packed meals ug drinks para sa mga pasahero samtang naghulat sa ilang mga sundo.
Matud pa ni Dr. Ramon Blancia sa Integrated Provincial Health Office nga kinahanglan moagi sa mandatory temperature check, hand washing, foot bath, disinfection sa mga bagahe, rapid test ug orientation ang tanang moabot nga stranded passengers sa dili pa sila makauli sa ilang mga lungsod.
Dugang pa ni Blancia nga gisuta usab sa pag-abot ang mga importanteng dokumento ilabina ang travel authority ug medical certificate sa mga pasahero ug kinahanglan nakasuot sila ug face mask ug mag-obserbar sa social distancing.
Naka-deploy sa Pagadian airport ang inspectorate team sa siyudad isip kaabag sa Civil Aviation Authority of the Philippines (CAAP) sa pagpatuman sa mga preventive measures aron masiguro nga hapsay ang pag-abot sa mga pasahero sa local nga tugpahanan.
(Photo courtesy: Victory Zamboanga del Sur)
