Nasa kustodiya na ngayon ng Police Regional Office 9 ang tatlong suspek sa pagdukot sa American national sa Zamboanga del Norte.
Ayon kay PNP PIO Chief PBGen. Jean Fajardo, hawak na nila ang tatlong suspek habang at large ang tatlong iba pa.
Paliwanag ni Fajardo, may direct participation sa kidnapping ang tatlong mga suspek kung saan napag-alaman na dalawa sa mga ito ay may kasong murder at pawang miyembro ng criminal group.
Sa ngayon, nasampahan na ng kasong kidnapping at serious illegal detention ang anim na mga suspek at iba pa sa Provincial Prosecutors Office sa Sindangan.
Matatandaang October 17 nang gabi nang dukutin ang American national na si Elliot Onil Eastman sa Sitio Tungawan, Barangay Poblacion, Sibuco, Zamboanga del Norte.
Nakitang sinakay sa bangka ang biktima at umalis ang bangka papunta sa direksyong pa-Sulu at Basilan.
Samantala, sa ngayon wala pang impormasyon ang PNP kung buhay pa ang dinukot na Amerikano.
