Mga suspek nga daw di madutla’g bala giingong napanuwayan, walay pangayaw nga mahitabo — tribal leader

Davao City- Tungod sa madugoon ug mangilngig nga insidente wala na mahinayon pa ang unta malipayong panagtapok sa magkabanay sa Tribong Matigsalug sa usa ka panubaran o ritwalan aron saulugon ang sa birthday sa mananambal ug ilahang lider nga si Bai Tinay sa Purok 4, Barangay Lacson, Calinan District, Davao City.

Atol sa eksklusibong interbyu sa DXDC RMN Davao kang Datu Angelito Landas amahan sa suspek gibutyag niini nga iyahang gipatambalan ang iyahang anak sa Panubaran kun balay tambalan sa tribong Matigsalug human kini napanuwayan o nasudla’g dautang espirito.

Giklaro usab sa Datu nga walay pangayaw nga nahitabo kagahapong adlawa ug dili usab magdeklara ang ilahang tribo og pangayaw sa kamatayon sa suspek.

Buot karon sa pamilyang Landas nga madala pagbalik didto ilahang bukid sa Sitio Kalayaan, Brgy. Tamugan, Marilog District ang patayng lawas sa suspek.

Gikasubo usab sa mga kabanay ang kamatayon sa mga personahe sa Calinan Police Station nga sila PCMS Tito Didal Lague, PCpl Mark Anthony Elman Corsino nga mga nakahiagom og mga samad tinigbasan ug pinusilan.

Samdan usab sila PCpl Ken Leo Diango Gumanoy ug ang drayber nga si Donald Ombrete.

Gikustodiya sulod sa Davao City Police Office ang usa pa ka nadakpang suspek nga si Rico Masacay ug pasakaan kini’g kasong multiple murder ug direct assault.

RadyoMaN Aimee Guinita