Davao City – Nailhan na sa Presinto Dos ang duha ka suspek nga nangluba sa usa ka lalake nga ilang gikawatan sa dalang CM Recto ning syudad 1:30 ganinang kadlawon.
Sa imbestigasyon sa Presinto Dos, nailhan ang mga suspek nga mao sila Justine Albeso ug Richard Danton nga pulos taga sa Digos City ug kasamtangang nanimuyo sa SIR 1 Matina ning syudad.
Ang mga suspek positibo gi-aydentipika sa biktima nga si Rogelio Dela Cruz ug nagpuyo sa Brgy. Caliclic, Island Garden City of Samal kinsa nakaangkon og samad sa likod nga bahin.
Nasayran nga samtang naglingaw-lingaw sa usa ka resto bar ang biktima kalit giluba sa duha si Dela Cruz sa wala matino nga rason.
Ayha hingpit misibat ang mga suspek gikawat pa nila ang 15 mil pesos nga kantidad lakip na ang kapin usa ka libo ka pesos nga sapi sa biktima.
Sa karon, naglusad na og manhunt operation ang kapulisan aron sikupon sila Albeso ug Danton tungod sa salaod nga ilang nakumitar.
RadyoMaN Joel Viray
