TACLOBAN CITY – Duha an patay matapos pamumun-on an mga ini ha usa nga tindahan han lechon manok ha Brgy. 72 PHHC, Tacloban City kanina.
Sumala han Tacloban City Police Office, ginkilala an mga biktima nga Hira Gino Sabaclin, 25 anyos ngan Ronnel Mendova 20 anyos, pareho nga magtatrabaho han mao nga tindahan ngan mga residente han Brgy. Hinuntad Basey, Samar.
Ginkilala naman an mga suspek nga hira Lito Cabigayan ngan usa nga diri pa nakikilal-an.
Basi ha inisyal nga imbistigasyon han mga kapulisan, alas 2 han kulop kakulop ginkonpronta ni Sabaclin ngan han iya garon hi Cabigayan tungod han nawawara nga cellphone ngan personal nga gamit han biktima.
Matapos an konprontasyon, nakit-an ini nga alyas “Lito” nga may kapot-kapot nga pisaw.
Pagkabuwas nakit-an nala han mga motorista an usa nga biktima nga patay na haraniay ha may entrance han establisyemento ngan an usa naman nga biktima ha sulod han panimalay.
Naka-angkon an mga biktima hin mga buno ha dughan nga parte han ira lawas nga nagin rason han ira dayon nga pagkamatay.
Ginkompirma han employer nga an narekober nga pisaw ha crime scene in gintatag-iyahan ni alyas “lito”.
Hapagka-yana, nagdudumara na hin hot-pursuit operation an Tacloban PNP agud maaresto an mga suspek.
