Ginpanginwala ni Raul Ramos, Presidente sang Federation of Sicogon Island Farmers and Fisherfolks Association nga iya ginsumbag ang guwardiya sang SIDECO kabangdanan nagluntad ang commotion sa isla sang nagligad nga adlaw.
Gin-athag ni Ramos nga wala na siya sang ikasarang manumbag bangud naka-agi siya sang mild stroke gani wala sang kamatuoran ang patu-pato nga nanumbag siya sang guwardiya.
Ginpaathag pa sini nga nagpatunga siya sa pagbinaisay sang mga pumuluyo kag mga guwardiya matapos gin-sita sang mga sekyu ang nagdungka nga pumpboat.
Ginapanindugan sang mga pumuluyo nga wala sang kinamatarung ang mga guwardiya nga mangsita sang mga nagapadulong nga mga turista sa isla sang Sicogon.
Ginapamilit man nila nga wala ginapanag-iyahan sang SIDECO ang bug-os nga isla sang Sicogon kag ila gid ipakigbatu ang ila kinamatarung bilang mga tumandok sang lugar.
