TACLOBAN CITY – Bibisitahon an Sinirangan Bisayas han duha nga cruise chips yana nga tuig ini in sumala han Dept. Of Tourism (DOT) Region 8.
Sumala kan DOT Tourism Development Area Manager Rina Apostol, gin-apil han cruise ships nga Silver Sea Discoverer han Monaco-based Silver Sea cruises ngan MS Bremen han German-based Hapag-Lloyd cruises an Eastern Visayas para han ira masunod nga expeditions.
An Silver Sea Discoverer in akos nga mag-akomodar hin 116 guests nga mabisita ha bungto han Capul ha Northern Samar ngan Limasawa ha Southern Leyte yana nga Mayo 4 ngan Mayo 8. An ira trip in mafocus ha culinary tourism.
An bungto han Capul ngan Limasawa in kaparte han 11 nga destinations ha Pilipinas nga bibisitahon han cruise passengers ha ira 13 ka-adlaw nga expedition dinhi ha aton nasud.
Yana naman nga Oktubre, an MS Bremen nga akos mag-akomodar hin 155 passengers in mabisita ha isla han Capul ngan Limasawa.
Ini na an ika-duha nga pagbisita han MS Bremen ha Rehiyon. An syahan in dida han tuig 2013 ha Kalanggaman Island ha Palompon, Leyte.
An mga pasahero o turista han mga cruise ships in karuyag nga maeksperyensyahan an kultura, history ngan livelihood activities han mga taga Rehiyon Otso.
Photo by: Roel Amazona, PNA
