Mga unibersidad sa Davao del Norte, wala pa’y nadawat nga direktiba sa pagpasuot balik og face masks sa mga estudyante

Davao City- Nunot sa pagkuyanap sa mga respiratory diseases ning kasamtangang panahon, una nang nagmando ang Department of Health (DOH) XI ug Davao City Health Office (CHO) sa pagpasuot balik og face masks sa mga magtutudlo ug estudyante sulod sa mga tulunghaan ilawom sa Department of Education (DepEd) XI.

Subay niini, nagsugyot usab ang CHO ngadto sa mga tulunghaan ilawom sa Commission on Higher Education (CHED) XI nga mamahimong mubuhat sa parehong lakang aron malikayan ang pagkatag pa sa maong mga balatian.

Sa impormasyong gipadala sa usa ka estudyanteng si Allen Naungayan gikan sa Davao del Norte State College (DNSC), gibutyag niyang wala pa’y direktiba gikan sa CHED XI nga nagsugo kanila sa pagpasuot balik og face masks apan gilayong andam hinuon siya nga sundon kung ugaling aduna na sila’y madawat nga official statement gikan mismo sa buhatan.

Samtang sa Davao City, pipila na ka mga estudyante sa kolehiyo ang nagasuot og face masks sa ilahang kaugalingong kabubot-on tungod usab sa padayong pagsaka sa kaso sa ubo ug trangkaso sa syudad.

Kanunay nga pahinumdom ngadto sa publiko nga hatagan og bili ang proper hand hygiene ug respiratory etiquette aron malikayan ang pagkatag pa sa respiratory illnesses.

RadyoMan Ivy Parido