Roxas City, Capiz – Ginserbehan sang warrant of arrest ang 37- anyos nga lalaki sa Barangay Navitas, Panay, Capiz bangud sa kaso nga rape. Ginkilala ang akusado kay Johnan Baes, residente sang nasambitan man nga lugar. Ang warrant of arrest sini ang gin-issue ni Hon. Lorencito B. Diaz, Presiding Judge sang Branch 17, RTC 6th Judicial Region, Hall of Justice, Roxas City nga ginpetsahan Hunyo 19, 2020. Yara na karon nakahunong sa karsel sang Panay PNP ang amo nga persona kag natalana nga igapresentar sa hukmanan nga nagpapanaog sang warrant of arrest sini. Samtang arestado man ang isa ka wanted nga persona bangud sa ginapangatubang sini nga kaso nga attempted murder kag frustrated murder samtang nagapanago sa Barangay Lunayan, Cuartero, Capiz.
Nakilala ang akusado kay John Falcis, 25-anyos ang pang-edaron sang nasambit nga lugar kun sa diin ang warrant of arrest sini ang gin-isyu kag pirmado ni Judge Kristine Tiangco- Vinculado sang RTC, Branch 16, Roxas City./
Nagalab-ot naman sa kabug-osan nga P320, 000 pesos ang ginrekomendar sang hukmanan nga piyansa sang amu nga persona para sa temporaryo sini nga kahilwayan sa duha sini ka kaso.
