Davao City- Gikumpirma sa Mines Safety Environment and Social Development Division sa Mines Geosciences Bureau 11 nga landslide prone area ang Shrine Hills.
Sigun ni MGB 11 MSEDD Chief Engineer Noel Angeles, 2004 dihang nakita sa terrain analysis ang pag huyang sa Shrine Hills ug 2015 hingpit kini deklara nga landslide prone area.
Human nadeklara ang shrine hills isip landslide prone area ang MGB 11 nagsugyot sa siyudad og mitigating measures ug paglimitar sa dugang kalamboan sa lugar duha na ka tuig miagi.
Sa pagdahili sa may Diversion Road niadtong biyernes gilayon naglusad og imbestigasyon ang MGB 11 aron masuta ang hinungdan sa landslide.
Migawas sa pagsusi nga ang road-widening sa DPWH ug dugang kalamboan maoy hinungdan sa landslide nunot sa walay hunong nga pag-uwan sa nakalabay nga semana.
Tuig 1983, unang natala ang landslide sa Shrine Hills ug samtang gadagan ang mga katuigan naghuyang ang bukid sa Shrine Hills dala na sa kainit sa panahon ug pag-ulan ug linog.
Gipasabot ni Angeles nga nawad-an og balanse ang pondasyon sa yuta tungod sa pagkaguba sa mitigating measures kilid sa bukid sa Shrine Hills bahin sa Diversion Road.
Pero sa kinatibuk-an nga assessment sa Mines Safety Environment and Social Development Division nagpabilin nga luwas sa publiko ang Shrine Hills gikan sa pagdahili sa yuta.
RadyoMan Joel Viray
