Gipusil patay ang usa ka Microfinance officer sa usa ka iladong lending company kagahapon pasado alas 10 sa buntag didto sa Purok Maningning, Brgy. Salawagan, Quezon, Bukidnon.
Giila ang biktima nga si Neckter C. Alcontin, 29 anyos ug mulopyo sa Purok 6, Crossing Bayabas, Toril, Davao City.
Sumala sa taho sa kapulisan, gikan sa usa ka group meeting sa Brgy. Delapa ang maong biktima ug paule na kini sa ilang opisina sa dihang gipabuthan kini sa wala mailang suspetsado.
Nakaangkon og unom (6) ka samad pinusilan sa 9mm nga pusil ang biktima sa nagkadaiyang parte sa kalawasan niini hinungdan sa daling kamatayon.
Gituohang pagpanulis ang motibo sa maong krimen kung asa gibitbit ang bag sa biktima nga adunay gibana-banang sulod nga P10,000.
Padayon pa ang imbestigasyon sa kapulisan alang sa pag-ila sa posibleng responsable sa maong pagpanulis.
