Davao City – Milagrong naluwas sa dakong sunog ang usa ka senior citizen nga si Mario Cellona, 68-anyos, nahitabo alas-3 sa hapon (Marso 9, 2021) sa Purok IKP ug San Jose, Brgy. Duterte, Davao City.
Sa interbyu sa DXDC RMN Davao kang Supt. Alex Pamaybay, Davao City Fire Director, gibutyag niini nga padulong na mag overhaul ang kabomberohan sa dihang adunay report nga aduna pay nahibiling senior nga bedridden sa lugar rason nga na-rescue sa 911 ug sa BFP ang biktima nga daling gidala sa Southern Philippines Medical Center (SPMC) human nakahiagom og minor injuries.
Matud ni Pamaybay, unang gi-rescue sa pamilya ang mga bata ug pakyas nang na-rescue ang senior tungod sa kakusog na sa kalayo. Nasayrang nakasemento ang balay asa nahimutang ang senior diin nihapa nalang kini samtang nagdilaab ang mga balay sa iyang palibot.
“Diha nato makita lagi ang gahum sa Ginoo kanang miracle nga atong gitawag. Naa gyud siya sa tunga sa sunog. Ang tanang balay, sa tunga-tunga siya. Didto siya na-rescue mismo sa iyang gihigdaan kay igo ra man siya maka kamang. So miracle kaayo, kanang power gyud nga gipakita sa Ginoo sa iyaha,” matud ni Pamaybay.
Dako ang pagpasalamat sa BFP official nga walay nakalas nga kinabuhi sa maong dakong sunog ug gipasalamatan ang kooperasyon sa mga fire fighters/volunteers human nagbaton og city wide general alarm tungod sa insidente.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
