Davao City – Mas makapaguba sa kamada sa hinabing pangkalinaw tali sa GRP panel ug CPP-NPA- National Democratic Front of the Philippines (NDFP) nga suspendido karon ang localized peacetalks nga giduso ni Mayor Sara Duterte-Carpio.
Matud ni ‘Save Our Schools Network’ Secretary-General Rius Valle, makapabungkag sa inisyal nga nasabutan sa GRP Panel ug CPP-NPA-NDFP ang localized peacetalks sa lokal nga kagamhanan.
Parehong inisyal nga nahisgotan sa duha ka partido ang Comprehensive Agreement on Respect for Human Rights and International Humanitarian Law (CARHRIHL) ug ang Comprehensive Agreement on Socio-Economic Reforms (CASER) apan masayang lamang kini kun ipamugos ang localized peacetalks track.
Gibarugan ni Valle nga ang grabeng kalisod ug suliran sa yuta sa mga mag-uuma usaka nasudnong hisgutanan ug dili kayang sulbaron sa peacetalks sa lokal nga kagamhanan sa siyudad apan kung buot gayod sa lokal nga kagamhanan nga ma-establisar ang kalinaw, angay patalinghugan ug tubagon sa gobyerno ang mulo sa mga kabos sa ingon matilawan usab nila ang haruhay nga kinabuhi.
Dili na bag-o sa dakbayan ang localized peacetalks sanglit kanhi na kini gisuwayan sa panahon sa inahan ni Presidente Rodrigo Duterte nga si Nanay Soling Duterte apan wala milampos.
Walay nakita nga benepisyo si Valle nga puwedeng mapupo gikan sa local talks nga buot mahitabo ni Mayor Inday ug nga dili sa local government angayang manukad ang pagbalik sa hinabing pangkalinaw kon dili didto sa national nga lebel.
RadyoMaN Joel Viray
