Sa interbyu sa DXDC RMN Davao kang Police Corporal Abil Sumampong, imbestigador sa Matanao Municipal Police Station, iyang gibutyag nga nalambigit sa aksidente ang usa ka KM Army Vehicle nga gimaneho ni Justin John Labsan, 29 anyos, diin sakay niini sila PFC Jose Teofilo, Sgt. Jerald Adilla sa 39th Batallion Philippine Army ug mga sakay nga sibilyan nga sila Janeth Dianon, Arstrong Ulie, Jucelyn Minggong, Garcia Ulie, ug Boyet Aton.
Sa imbestigasyon, gikan Bansalan padulong Digos City ang Military truck ug Toyota Rush nga gimaneho ni Renante Villegas, 47 anyos, samtang gikan Digos ug padulong Bansalan ang Toyota Fortuner nga gimaneho ni Kiant Andrew Polestico, 22 anyos.
Pag-abot sa incident area, kalit nga miilog og lane ang Toyota Fortuner, diin giingong nakatulog ang driver, rason nga nabanggaan niini ang Toyota Rush ug pagkabangga niini sa Military truck. Samtang, ang usa ka Mitsubishi Mirage nga gimaneho ni Ricky James Sulleza, 32 anyos nga gikan Bansalan padulong Digos, nabangga usab sa likod sa Military truck. Hinungdan nga naangol ang driver sa Toyota Fortuner ug pito ka pasahero sa Military truck.
“Stable na man sila. Wala may ingon nga serious (injuries). Initially, nag-ingon na man papa sa driver sa Fortuner nga mo-assist daw sila sa medical ug (damyos) sa sakyanan,” saysay sa imbestigador.
Nagpahimangno ang kapulisan sa mga motorista nga mag-amping kanunay sa pagbiyahe aron malikayan ang susamang insidente.
RadyoMaN Kirby Manzon
