Gipahayag ni MMCECI Executive Director Inorisa Elanto nga sa maong ihap, 38 palang ka OFW ang ilang nadokumento ug ang unom niini pulos mga taga-Davao City.
Giadtoan na usab sa maong NGO ang mga pamilya sa unom ka OFW nga taga Calinan, Matina, ug Puan ug gi-endorso na usab ang mga kasayoran sa unom ka OFW ngadto sa Department of Migrant Workers Davao Region.
Dili maseguro ni Elanto, kung duna bay mga Pinoy nga nagbakasyon sa Israel ug mga OFW nga dili dokumentado, kay nagpadayon pa ang ilang pagpanubay sa mga Pinoy nga naipit karon sa bangi tali Hamas ug Israel.
Ang subo nga reyalidad karon kay mas gipili pa sa kadaghanang mga Pinoy nga magpabilin sa Israel, kaysa mouli sa nasod luyo sa nagkagrabe nang ang kasamok sa maong nasod. Dismayado si Elanto sa hinay nga pagtubag sa gobyerno sa pagpahigayon og paspas nga repartriation sa mga Pinoy nga anaa sa maong nasod.
Nanawagan siya sa mga Dabawenyo nga dunay pamilya sa Israel ug Palestine, makig-alayon sa buhatan sa DMW-XI o sa ilang buhatan aron matabangan sila sa ilang mga minahal sa kinabuhi nga tua karon sa Israel ug Gaza, ilabi na nga upat na ka OFW ang namatay ug duna pay missing hangtod karon.
RadyoMaN Joel Viray
