Davao City – Dili angay ipahid sa mga namauli nga Overseas Filipino Workers kon OFW ang pagkanat sa 2019 Corona Virus Disease kon COVID-19 ug labaw nang dili pakasad-on ang giilang mga bag-ong bayani sa modernong panahon ugali mahitabo ang gikahadlokan nga ‘second wave’ sa pandemic tungod sa ilang pagbalik dinhi sa nasud.
Sumala sa Mindanao Migrants Center for Empowering Actions Incorporated, ang virus usa ka kalibutan-on nga krisis ug walay ni bisan unsa nangandoy nga mahitabo kini diin ang pagpanguli sa mga OFW sa nasud resulta kini sa paghunong sa operasyon sa mga kompanya nga ilang gi-alagaran maong nawad-an sila og trabaho.
Matud ni Mindanao Migrants Social Worker Jojo Velasco nga kon aduna may kagul-an kon kabalak-an sa pagpanguli karon sa liboan ka mga OFW kana dili ang posibleng sakit nga ilang dad-on apan ang dakong epekto sa ilang mga pamilya ug sa ekonomiya sa Pilipinas.
Ang mga OFW gitawag nga bayani sa ekonomiya gumikan sa 25 bilyones dolyares kon 11% nga gi-ambag sa kinatibuk-ang Growth Domestic Product sa nasud pinaagi sa remittances nga ilang ginapadala sa ilang mga pamilya dinhi sa nasud.
Subay sa datos sa 2017, dili mu-ubos sa 2.3 milyones ka Pilipino ang nagkatag sa kalibutan apan gumikan sa pandemic 300,000 kanila ang nawad-an og trabaho ug nanguli diin 25,000 ang nagtapok sa isolation facilities nga gihatag sa gobyerno ngadto kanila.
Suma ni Velasco, dili kaya atimanon sa kagamhanan ang mga OFWs gumikan sa kadaghan ug nagpasabot usab kini nga dugangan ang tabangonon sa gobyerno hilabi na nga walay kasigurohan kon duna ba sila’y masudlan nga trabaho karon nga nagsagubang sa grabe nga krisis ang nasud.
RadyoMaN Joel Viray
