Mindanao, padayong makasinate sa ulan tungod sa Hanging Habagat

14

Bisan dili direktang apektado sa bagyong Falcon ang Mindanao apan dili pa gihapon makalikay sa  kasarangan ngadto sa kusog nga pag-ulan ang  Cagayan de Oro ug Misamis Oriental tungod sa South West Monsoon  kon Hanging Habagat.

Mao kini ang gibutyag ni Catherine Asunto ang Weather specialist sa Pag-asa Mindanao Station sa Molugan, El Salvador City sa Misamis Oriental.


Matud ni Asunto nga ang South west Monsoon gipakusog sa bagyong Falcon bisan ang maong bagyo tua na kini lawod saTuguegarao, Cagayan.

Gibutyag ni Asunto nga tungod sa hanging habagat, dili malikayan ang mga localized thunderstorms nga maoy magdala sa kusog nga ulan dinhi sa Cagayan de Oro ug Misamis Oriental.

Matud ni Asunto nga sigon sa ilang forecast, mogawas si Falcon sa Philippine Area of Responsibility sa Biyernes.

Apan matud ni Asunto nga samtang aktibo pa si Falcon sa Northern Luzon, nagpabiling gihulga ang tibuok Mindanao sa kusog nga ulan ug hanging habagat kay gipakusog kini ni Bagyong Falcon.

Dinhi sa Cagayan de Oro, gipahayag ni Nick Jabagat, Hepe sa City Disaster Risk Reduction and Management Office sa City hall nga 24/7 ang ilang weather monitoring sa Hanging Habagat.

Matud ni Jabagat nga sama sa ilang naandan, three shifting ang duty sa ilang mga disaster personnel aron dili ma-ulahi ang ilang mga pag-responde kon gikinahanglan.

Ingon usab niini ang gihimo sa mga disaster personnel sa kapitolyo matud ni Carlo Duga-duga, Public Information Officer sa Kapitolyo Probinsyal.

Facebook Comments

From Advertisers