Patay ang usa ka 49 anyos human sa nahitabong disgrasya sa kadalanan didto sa Brgy. Catipan, Mabuhay, Zamboanga Sibugay ug gikaangol sa 6 ka pasahero.
Sa nakuhang impormasyon gikan sa PNP Mabuhay, usa ka Mitsubishi Canter Mini-Dump truck nga nakapangalan kang Tawpic Jalaide sa Ayesha Construction kinsa gimaheno ni JR Olarte taga Lintangan, Sibuco, ning probinsya sa Zamboanga del Norte.
Sakay niini ang pito ka pasahero nga sila si Rich Dale Villplana 20; Robert Bartolaba 19; Arthuro Trosa 24; Ariel Trosa 18; Roel Rivera 21; Elizer Pampanga 26 anyos ug ang namatay nga si Reynaldo Bulanon, pulos kini sila residente sa Punawan, Mabuhay ug mga trabahante sa Ayesha Construction.
Gikan matod pa kini sila sa unang project site sa Punawan ug miadto kini sa laing project site nga anaa sa brgy. Catipan.
Saysay pa sa mga sakay niini nga nagkiay-kiay ang ilang gisakyang drumtruck hangtod nga nawad-an ug control sa manobela ang driver hinungdan maayong pagka hulog niini sa pangpang, resulta sa wala damhang kamatayon sa trabahante.
Boluntaryo usab nga mitahan sa mga pulis ang driver ug nagpaabot nalang kung unsay plano sa pamilya sa namatay.
