Pagadian City – Naharang sa otoridad ang shipment sa smuggle nga segarilyo nga nagkantidad sa P1.2 million pesos.
Sumala ni Police Lieutenant Colonel Jonery Ojas, Pagadian City police chief, ang maong shipment sa kinahon nga smuggled cigarettes naharang alas 8:45 sa gabii sa quarantine control point sa Brgy. Baloyboan niining syudad.
Gidugang ni Ojas nga ang tropa sa Baloyboan Community Police Assistance Center (Compac) mao ang nisita ug nihimo sa checkpoint operations batok sa wing van truck nga gikargahan sa 115 ka kahon sa segarilyo.
Sigon ni Ojas moabot sa 91 gikan sa ihap nga 115 kahon ang naila nga Fort cigarettes samtang ang nahibilin nga 24 ka kahon giingon nga New Berlin.
Ang mga dinakpan mao sila si David Batu-on Franco, 43, driver, ug ang kaabin niini nga si Michael Bryan Tagaytay, 21anyos, pakyas ang mga suspek sa pagpresenta sa mga importante nga mga dukumento nga legal sa ilang shipment.
Ang maong mga dinakpan ang naa karon gikostodya sa Pagadian City police station og ang mga kontrabando lakip ang gikargahan niini nga sakyanan ang gidala sa maong police station alang sa tukmang disposisyon. CCTO: PNP Pagadian
