Ipinababa sa sampung taong gulang mula sa kasalukuyang 15 taong gulang ang minimum na edad para sa mga batang nakagawa ng karumal-dumal na krimen.
Ito ang nilalaman ng panukalang batas na inihain ni Senator Robinhood Padilla na layong amyendahan ang Juvenile Justice and Welfare Act o ang Republic Act 9344 dahil sa pagtaas ng bilang ng mga youth offenders ngayon.
Sa panukala, ang mga batang edad na sampu hanggang bago mag-18 anyos na nakagawa ng krimen at naghihintay ng desisyon ng korte ay ipapasok sa youth rehabilitation center o Bahay-Pag-asa at ma-e-exempt din ang mga ito sa criminal liability at isasailalim lamang sa intervention maliban kung mapatunayan ng korte na may discernment o nauunawaan ang bigat ng krimen na ginawa.
Gayunman, ang mga kabataang higit sa sampung taon hanggang 18 anyos na nakagawa ng karumal-dumal na krimen ay hindi exempted sa criminal liability partikular sa mga kaso ng parricide o pagpatay sa magulang, murder, infanticide o pumatay ng sanggol, kidnapping, arson, illegal drug case, serious illegal detention at carnapping kung saan may pinaslang at may pinagsamantalahan.
Sa mga non-heinous crimes ay idi-dismiss ang kanilang mga kaso at irerefer ang bata sa local social welfare and development officer na siyang tutukoy naman kung dapat pa ba silang ibalik sa mga magulang o ipasok na lamang sa intervention program.
