Davao City – Kasong murder ug attempted murder ang napasaka sa Magsaysay Police Station batok sa suspek nga si Jan Michael Daweng, 18-anyos, grade 12 student ug residente sa Purok-7, Dalawinon, Magsaysay ug laing upat ka mga kakaubanan niini nga sila alyas Cyril, Antonio, Raul ug Jhon Marsh kinsa pareho nagpuyo sa Kasuga, Magsaysay Davao del Sur.
Kahinumdoman ang suspek maoy midunggab sa mag classmate nga menor de edad diin usa ang patay nga si alyas Kris ug usa ang samdan nga si alyas Tin-tin, pareho residente sa nahisgutang lugar.
Sa interbiyu sa RMN Davao kang P/Cpl. Krister Nahine, Public Information Officer sa Magsaysay Municipal Police Station, nagto-o ang kapulisan nga pagpanglugos ang motibo sa pagpatay sa biktima.
Matud ni Nahine nga gihuwat pa nila ang resulta sa awtopsiya aron masayran kun duna bay nahitabong pagpanglugos sa biktima.
Gipaabot usab ni Nahine ngadto sa tanang ginikanan nga dapat ilang bantayan ang ilang mga anak nga mga minor de edad aron malikay sa susama nga krimen.
Gi-awhag ni Nahine nga mosunod ug mutoman sa curfew hours ang mga batan-on nga gipatuman sa ilang lugar.
Samtang ang kapolisan sa Magsaysay naglusad og symposium aron pagpasabot sa mga ginikanan mahitungod sa kampanyan sa illegal nga droga ug gangsterism.
RadyoMaN Don Pulayao
