Davao City – Naglisod pagdawat ang kabanay sa nalumos-patay nga lalaki diin nakit-an na kagahapon sa buntag ang patayng lawas sa usa ka menor de edad nga gituuhang nalumos sa Davao River.
Giila ang biktima nga si Alyas Anghel, 17 anyos, taga New Carmen Tugbok ning syudad diin base sa post sa facebook iyang igsuon nga si Alyas Jean, nakaplagan ang patayng lawas sa Waan diin dili na maitsura ug dili na kaayo mailhan ang lawas ug nawng ni Angelou.
Kahinumduman nga naligo kaniadtong December 10, pasado alas dos sa hapon ang biktima kauban ang walo ka mga barkada niini sa Davao River apan dili kabalo mulangoy ang biktima ug first time usab ni Anghel sumala pa nga maligo sa maong sapa hinungdan nga nalumos kini.
Nahinabi sa DXDC RMN Davao ang paryente niini nga si Lyn, sumala niya nga nangayo og tabang ang biktima ayha kini nalumos ug nawala apan matud pa walay mitabang niini.
Karon nga nakit-an na si Anghel ug nahibal-ang wala nay kinabuhi, subo ang pasko sa pamilya niini apan magpabilin kanila ang mga memorya sa kaniadtong nagkauban pa sila sa milabayng mga pasko.
RadyoMaN Renz Barbarona
