Davao City – Walay partisipasyon ang Mintal Barangay Council kon ang Barangay Mintal mismo may kalabutan sa wala mahinayon nga concert nga ipahigayon unta sa Mintal Gymnasium diin imbitado ang usa ka artista kinsa gipadayag ang iyang pagkadismaya pinaagi sa social media.
Kini mao ang gitino karon ni Mintal Brgy. Captain Rey Bargamento atol sa ekslusibong pakighinabi kaniya sa DXDC News Team human nga nadamay ilang barangay sa maong isyu.
Saysay ni Bargamento, mirenta sa ilang gymnasium ang usa ka Pag-asa Riders Club-Mintal organization aron magpahigayon sa maong event gabii sa Disyembre 8.
“Amo lang sila gipangayuan og payment sa venue gani minimum lang kay taga-Mintal lage unya few days before nag Araw (ng Mintal) nagkita pa mi ato sa parade tapos nangumusta ko sa sales pero ana sila okay man daw unya two-days before the event naay niadto nga amiga ni Kiray kay natingala siya nga wala pay na deposit nga advance payment,” segun niini.
Subay niini, walay obligasyon ang Barangay Mintal sa mireklamong artista ingon man sa mga nipalit og ticket aron unta musaksi sa pinasahing kalingawan subay sa selebrasyon sa Araw ng Mintal.
RadyoMaN Jason Amisola
