Davao City – Kasama, mas molig-on ang atong pagto-o diha kang Kristo Hesus kung mugahin kita ug igong panahon pananglit diha sa ‘Simbang Gabi’ kun ‘Misa De Gallo.’
Kini maoy mensahe ni Fr. Hermie Garcia sa ‘Our Lady of the Assumption Parish Church’ nahimutang dinhi sa siyudad sa Davao.
Matud ni Father Hermie, ang ‘Misa De Gallo’ nagkahulogan usab sa pag-ampo ngadto kang Birhen Maria ug kini parte sa pagpangandam sa adlaw sa pagkatawo ni Hesus pinaagi kang Maria nga maoy gipili sa Diyos aron matawo ang Manunubos sa kalibutan.
Daku usab ang pagtoo sa usa ka Criminology intern nga si Muslemin Ampao, 22 anyos, nagpuyo sa Purok New Matina Gravahan, ning dakbayan nga adunay katumanan ang iyang pangandoy sa kinabuhi nga mahimong hingpit nga usa ka pulis, maoy hinungdan nga wala gayud siya niundang sa paggahin og igong panahon sa ‘Simbang Gabi’ gani iyang paningkamotan nga makompleto ang ‘9 Mornings’ sa pagsimba.
Gidugang usab ni Ampao nga iyang napamatud-an mismo sa iyang kinabuhi nga sa bata pa siya, gitagaan siya ug maayong panglawas ug nagmalaumon nga walay imposible sa pagkab-ot sa iyang gpangandoy sa kinabuhi basta uban ang kaseguruhan nga adunay katumanan ang tanan kung isalig lamang nato kini ngadto sa Labaw’ng Makagagahum.
RadyoMaN Don Pulayao
