Davao City – Nadisgrasya na hinoon ang usa ka motorista kinsa misuway og sibat sa checkpoint sa Sasa PNP resulta sa iyang nahiagoman nga samad ug pangos sa kalawasan.
Imbes nga musibat gikan sa mga tinugyanan sa balaod, bagsak na hinoon sa Southern Philippines Medical Center (SPMC) ang driver nga si Razil Binoya, nagpuyo sa Trading Boulevard ning siyudad.
Una niini, nagmuntar og checkpoint ang Sasa PNP sa panguna ni Senior Inspector Sendo sa Kilometer 11 Sasa dihang naharang si Binoya alas-11:15 kagabii.
Mipaturatoy hinoon matud pa og padagan sa iyang Suzuki resulta sa pila ka minuto nga ginukdanay sa Mobile Number 91 ug sa suspek.
Bisan og gi-unsa og hangyo sa mga pulis si Binoya nga mohunong, mas nagpakusog hinoon kini og padagan apan di malas lang kay aksidenteng nadalin-as ang ligid sa motor mao natumba kini.
Nasuta nga misuway og sibat sa checkpoint ang suspek gumikan walay ikapresenta nga driver’s license si Binoya samtang sayron usab sa kapulisan kung duna bay OR/CR ang iyang motorsiklo.
Dunay dakong posibilidad nga mag-atubang og kaso ang suspetsado inig gawas niini sa ospital.
RadyoMaN Joel Viray
