Indi matuod kag makabig nga ‘misinformation’ ang pahayag sang isa ka anti-vaccine doctor nga mapatay ‘after 2 years’ ang mga nagpabakuna sa COVID-19 vaccine.
Ini ang pag-athag ni Dr. Louie Tirador, Cardiologist kag katapo sang Philippine College of Physicians – Western Visayas Chapter.
“Isa ini ka misinformation nga mapatay ang tawo kon mapabakuna after two years. Kon amo na matabo te ubos gid ang mga Kano eh. Bilog nga kalibutan mapatay sila tanan? Indi na ya tuod. Ang history sang bakuna halin pa na sang una. Na-eradicate ang small pox sa pagpabakuna. Ang paghina sang mga polio, paghina sang mga measles tungod may bakuna kita,” ang pahayag ni Dr. Tirador.
Ginhalimbawa ni Dr. Tirador nga sa Estados Unidos, wala na halos nagamask ang iban nga tawo bangod kalabanan sa ila ang nabakunahan na sang COVID-19 vaccine.
“Tungod nag-una to pabakuna sa US, sa Israel kag sa United Kingdom that’s why ang ila incidence nga sa pagdisgrasya ukon napatay bangod sa COVID nag-dyutay na gid. Kag subong sila, wala na sila ya ga-face mask,” ang dugang nga pahayag ni Dr. Tirador.
Ginhalimbawa man ni Dr. Tirador ang sitwasyon sa India sa diin kalabanan sa mga tawo wala nagapati sa bakuna kag sa halit sang virus rason nga madamo ang napatay.
“Ang mga tawo sa India especially sa rural areas, mga ignorante kag nahadlok sa pagpabakuna. Ang ila to ya, ang ipot sang baka amo na ang ila ibulong. Kundi ang kaso nila gataas, wala sila gapati mo. Dapat di edukasyon, ang insakto nga pag-edukar sa mga tawo, indi nga pahugon,” ang pahayag ni Dr. Tirador.
