TACLOBAN CITY – Patay na han makit-an an duha nga mag-asawa ha ira panimalay ha Brgy. 109-A V&G, Tacloban City kasangkulop, October 14.
Ginkilala an mag-asawa nga hira Rea Mae Azusena, 28 anyos ngan hi Jeffrey Azusena, 30 anyos.
Nagawas ha inisyal nga imbistigasyon han mga otoridad, nag-aaway an mag-asawa dida han gab-i han October 13, basi han testimonya han mga witnesses ngan tigda nala naghilom an panimalay.
Nakit-an han mga witnesses October 14 han aga nga nakahandusay na ha kusina hi Jeffrey ngan nagbubura an baba, waray na ini kinabuhi.
Nakit-an naman hi Rea Mae ha kwarto han ira panimalay nga waray na gihap kinabuhi.
Sumala han Tacloban PNP station 1, may nakit-an nga marka ha liog ni Rea Mae nga ginpitlok ini, samtang gintutuuhan naman nga nagpakamatay gamit an hilo hi Jeffrey.
Nagtutuo an mga kapulisan nga ginpitlok ni Jeffrey an iya misis.
Ginhihingita han mga otoridad nga selos o family problem an nagpapaluyo hini nga insidente.
May ada duha nga anak an mag-asawa nga nangangaturog han mahinabo an insidente.
Pero nagpapadayon pa an imbistigasyon han mga otoridad. (With reports of Ruthi Capili, RMN News)
