Iloilo City- Nadakpan ni mister si misis upod ang nobyo sini sa isa ka lodging house sa Lapaz, Iloilo City.
Una diri, ginasundan na sang mister nga si alyas Cardo, 23 anyos humalin pa sang bulan sang Hunyo ang asawa nga si alyas Carmen, 22 anyos kag isa ka call center agent.
Kaina sang udto, ginsunod ni Cardo sakay sa iya motorsiklo si Carmen nga nagasakay naman sa taxi.
Sang nakita ni Cardo nga nagsulod sa lodging house ang asawa upod ang nobyo nga si alyas Jun-jun, 22 anyos, gilayon niya ginkonfrontar ang duha.
Bangud sang tuman nga kaakig, ginlampusan ni Cardo sang helmet si Carmen kag nagtapungulay sila ni Jun-jun.
Gilayon naman nagresponde ang mga security guard kag gindala sa police station ang mag-asawa lakip na si alyas Jun-jun.
Sa pinakaulihi nga impormasyon nga nakuha sang RMN news team, gintugyan na lang ni Cardo kay Carmen ang desisyon kon sin-o sa ila ni Jun-jun ang pili-on sini.
Nahibaluan nga may isa ka bata sanday Cardo kag Carmen.
(photo from web)
