Misis sa iya bana nga may kerida: ‘Palangga ko gihapon sya’

786

BAGO CITY – “Bisan pa nga may kerida ang akon ang bana, palangga ko gihapon siya para nalang sa amun mga kabataan”.

Amu ini ang panuaron sang asawa nga si Kathleen Sixto, 36 anyos sa exclusive interview sang dyHB.

Madumduman nga kahapon sang aga, gintiro sang makaapat ka beses sa tangkugo sa Crossing Kamatis, Barangay Sampinit ang bana nya nga si Marlon, 36 anyos sang isa ka lalaki nga kerido man sang kerida sang iya bana nga ginkilala kay Frank Alvarez, 47 anyos sang Relocation Site, Barangay Lag-asan. Si Alvarez ang nagatrabaho sa City Engineer’s Office sang Bago bilang electrician.

Suno sa asawa natukiban niya ang pagpangerido sang iya bana sang November 2017 sa diin ginbilin niya ang iya ikaduha nga bata nga babaye, tatlo ka tuig ang edad kay Aiza Salavante. Si Aiza, 29, ang tupad balay nila, bestfriend nya, may bana nga ginkilala kay Benny nga pakaduha naman sang iya nga bana.

Ang pagbilin niya ina bangod kay maproseso ini sang iya papeles para mag-abroad bangod may ara man sila sang subang nga 13 anyos nga babaye nga iya preparahan ang pag-eskwela. Si Marlon ang isa ka driver sang jeep nga nagabyahe Punta Taytay-Taloc sa sulod na sang duha ka tuig.

Sang ginbilin niya ang iya bata kay Aiza, didto na sya nagduda bangod indi na kaisa makontak ang iya nga bana, bisan pa si Aiza nga iya bestfriend ang wala man gasabat kon tawgan. Didto na sya nakabati sang mga sugilanon, halin sa iya mga tupad balay kag pamilya nga may relasyon si Aiza kag iya bana, sa diin pirmi ini sila makit-an nga duha sakay sa ginamaneho nga jeep ni Marlon. Ginahimo man nga driver ni Aiza si Marlon sa iya mga transaksyon sa lending.

Tubtob nga isa ka bes sang December 2017 nagdesisyon sya nga magbulag sa iya nga bana kag nag-istar ini sa iya himata sa Barangay Granada, sa diin nagpauli siya nga wala nakahibalo ang tanan. Ginlambatan niya ang iya bana sa Bacolod Plaza, matapos nga iya nahibaluan nga manyapon sanday Aiza, bana ni Aiza, iya bana kag duha niya ka nga kabataan sa SM. Amu to ang tion nga nagpauli siya kag nakibot siya sa iya nakit-an bangod sa ara sa front seat sang jeep nga ginadrive sang iya bana si Aiza nga nagakugos sang iya bata kag bana ni Aiza nga si Benny samtang ang ila subang ara sa likod.




Ang subang niya nga bata amu ang nagapahibalo sa iya sang nagakatabo. Bangod sa kainit, ginhana sini nga balabagan ang jeep nga kon wala ka preno ang iya bana, posibli nabungguan pa sya tubtob nga nagkadto sila sa SM sa natalana nga panyapon. Bangod kay wala sya ginhagad, ini ang nagbakal nalang sang Jollibee, upod ang iya tatlo ka tuig nga bata kag didto lang sya nagpa-amolya sa sulod sang jeep kag nagkaon.

Sang natapos na ang panyapon, naglakat na sila apang bangod sa kainit ni Marlon sa iya, ini ang ginabuyayaw sa diin nagatubong man si Benny, dala siling nga indi pagmalisyahan ang ang iya asawa nga si Aiza bangod nagabulig pa gani sila. Indi sya dapat mangimon sa wala sa lugar.

Bangod sa kainit sa amu nga tion, ginbilin ini sa bangga sa antis pasulod sa ila nga balay sa Taloc, apang bangod sa kalain sa buot, wala ini nagpauli sa ila, sa baylo nagbalik ini pa Bacolod kag didto nagtulog sa Granada.

Sang nagbalik na sya liwat sa Metro Manila sakay sa bus sang Enero 2018, sige man iya communicate kay Aiza kag nagsiling ini nga wala sya sang mahimo bangod naluyag si Marlon sa iya. Didto naman kag naglain ang iya buot kag nakonpirma nga may relasyon gid man si Aiza kag ang iya nga bana.

Gin-antos nya ini para nga makalat abroad apang sa medical sa ulihi nagguwa nga nagabusong siya sang ila pangatlo nga bata, kag ini lalaki.

Bangod kay wala nadayon ang iya lakat, nagbalik ini sa Negros kag didto naghitsuhanay na sila sa iya nga bana. Wala gihapon naga-ako ang bana, tubtob nga nagsiling nalang ini nga OK nalang sa iya ang pagpangerida, importante nga tagaan lang sila sang kwarta para sa ila pagkaon. Nag-ugyon man diri si Marlon sa diin nagahatag ini sang P200 pesos kada adlaw para sa iya asawa nga nagabusong kag duha ka mga kabataan nga babaye.

Paano niya nakilala ang nagpatay sa iya bana nga si Frank Alvarez? Sang 2014, si Alvarez ang nagbulig sa ila palibot sa Barangay Taloc nga mag-asikaso sa ila koneksyon sa Ceneco. Dira man posibli nagsugod ang relasyon nila ni Aiza. / In photo: Iloy ni Marlon nga si Alicia kag asawa nga si Kathleen

(Bantayan naman ang version sang ginasiling kerida nga si Aiza)

Facebook Comments